కన్నుమూసిన ప్రముఖ బాలీవుడ్ సింగర్ కేకే.. లైవ్ షోలో గుండెపోటు..

ప్రముఖ బాలీవుడ్‌ గాయకుడు కేకే (53) పేరుతో ప్రసిద్ధి గాంచిన కృష్ణకుమార్‌ కున్నాథ్‌ కోల్‌కతాలోని నజురుల్‌ మంచా ఆడిటోరియంలో ప్రదర్శన అనంతరం హోటల్‌కు చేరుకున్న కేకే అక్కడే కుప్పకూలిపోయారు. దీంతో వెంటనే  అతడిని నగరంలోని సీఎంఆర్‌ఐ ఆసుపత్రికి తరలించారు. అనంతరం డాక్టర్లు పరీక్షించి కేకే మరణించినట్లు ధ్రువీకరించారు. కేకే మరణించడానికి కంటే ముందు తను ప్రదర్శన ఇస్తున్న పోస్టులను సోషల్‌ మీడియాలో పంచుకున్నారు.

ఢిల్లీలో జన్మించిన కేకే 1999లో బాలీవుడ్‌ చిత్రం పాల్‌ సినిమాతో పరిచయమయ్యారు. అనంతరం పలు హిట్‌ సాంగ్స్‌ పాడి భారతీయ చలన చిత్ర పరిశ్రమలో నేపథ్య గాయకుడిగా  తనదైన ముద్ర వేసుకున్నారు. హిందీ, తెలుగు, తమిళ, మళయాలం, కన్నడ, బెంగాలీ తదితర భాషల్లో పాటలు పాడారు.

కేకే మృతితో ఆయన అభిమానులతో పాటు పలువురు ప్రముఖులు షాక్‌కు గురయ్యారు. తమ అభిమాన గాయకుడు ఈ లోకాన్ని విడిచిపెట్టి వెళ్లాడని సామాజిక మాధ్యమాల్లో సంతాపం ప్రకటిస్తున్నారు. ప్రధాని మోదీ, క్రికెటర్‌ వీరేందర్‌ సెహ్వాగ్‌, నటుడు అక్షయ్‌కుమార్‌తో సహా పలువురు సంతాపం వ్యక్తం చేశారు.

‘‘కేకే పాటలు అన్నిరకాల భావోద్వేగాలను ప్రతిబింబిస్తాయి. అన్ని వయసుల వారిని అలరిస్తాయి. ఆయన పాడిన పాటలతో కేకేను ఎప్పటికీ గుర్తించుకుంటాం.  కేకే కుటుంబ సభ్యులకు నా ప్రగాఢ సానుభూతి. ఓం శాంతి’’ అని ప్రధాని ట్వీట్‌ చేశారు.