వైఎస్ జగన్‌కు ఏపీలో పాలనపై అరుదైన గౌరవం.. సిఎం ఆఫ్ ది ఇయర్

16

ఆంధ్ర ప్రదేశ్ ముఖ్యమంత్రి వైఎస్ జగన్మోహన్ రెడ్డి ప్రతిష్టాత్మక అవార్డు దక్కింది. ముఖ్యమంత్రిగా బాధ్యతలు చేపట్టిన రెండేళ్లకే దేశంలో ఉత్తమ ముఖ్యమంత్రిగా గుర్తింపు తెచ్చుకున్నారు. ఈ మేరకు స్కాచ్‌ గ్రూపు ‘సీఎం ఆఫ్‌ ది ఇయర్‌’ అవార్డుతో గౌరవించింది. పరిపాలనలో ఉత్తమ ప్రతిభ కనపర్చినందుకు గాను ఈ అవార్డును ఇస్తున్నట్లు స్కాచ్ గ్రూప్ ఛైర్మన్ వెల్లడించారు.

ఈ సందర్భంగా సమీర్‌ కొచ్చర్ మాట్లాడుతూ.. దేశ వ్యాప్తంగా ఏడాది పాటు వివిధ రాష్ట్రాల్లో ప్రాజెక్ట్ స్థాయి ఫలితాల అధ్యయనం ఆధారంగా ముఖ్యమంత్రి వైఎస్‌ జగన్మోహన్ రెడ్డిని ‘సీఎం ఆఫ్‌ ది ఇయర్‌’గా ఎంపిక చేసినట్లు ప్రకటించారు. ‘‘రాష్ట్రంలో అమలవుతున్న ‘వైఎస్సార్‌ రైతు భరోసా కేంద్రం’ పథకం ద్వారా ముందుగా ప్రకటించిన కనీస మద్దతు ధరకే గ్రామ స్థాయిలో రైతులు పండించిన పంటను సేకరిస్తున్నారు. ఈ పథకం ద్వారా రైతులకు ఎంతో మేలు జరుగుతోంది.

‘వైఎస్సార్ చేయుత పథకం’ మధ్య వయస్కులైన మహిళలకు 4 సంవత్సరాల కాలానికి జీవనోపాధి అనుసంధాన రుణాలు ఇవ్వడం ద్వారా వారి ఆర్థిక సాధికారతపై దృష్టి పెడుతుంది. అలాగే మహిళల భద్రత, రక్షణ కోసం తీసుకొచ్చిన దిశ, అభయ్‌ వంటి పథకాలు శాంతిభద్రతల పట్ల అవగాహనతో పాటు మహిళల రక్షణకు కృషి చేస్తున్నాయి’’ అని సమీర్ ప్రశంసించారు.

‘‘కరోనా కాలంలో ప్రజలను ఆదుకోవడంలో ఏపీ ప్రభుత్వం చూపిన చొరవను ప్రత్యేకంగా ప్రశంసించాల్సిందే. కోవిడ్‌ కష్టకాలంలోనూ రాష్ట్రవ్యాప్తంగా 123 పథకాలను ప్రభుత్వం అమలు చేసింది. ముఖ్యమంత్రిగా వైఎస్ జగన్ కొన్ని సాహసోపేత నిర్ణయాలను తీసుకున్నారు. పాలనను మరింత సమర్థవంతంగా, పారదర్శకంగా మార్చడానికి గత రెండేళ్లలో రాష్ట్రం ప్రభుత్వం అనేక విప్లవాత్మక చర్యలు తీసుకుంది.

పలు రంగాలలో వినూత్న కార్యక్రమాలు ప్రారంభించింది. ఇందుకు సంబంధించి పూర్తి క్రెడిట్‌ ముఖ్యమంత్రి వైఎస్‌ జగన్‌కే దక్కుతుంది. ఈ చర్యలన్ని పాలనలో మరింత పారదర్శకతను పెంచడం.. సమగ్ర వృద్ధి సాధించడంలో కీలక పాత్ర పోషించాయి’’ అని సమీర్‌ కొచ్చర్‌ పేర్కొన్నారు.

  • 8
    Shares